امتى تعرف انك بتشوف فيلم عربى؟!

**كريم نور** الثلاثاء أكتوبر 09, 2007 8:21 pm

عندما يكون البطل مريضا وتقدم له البطلة حبة الدواء مع كوب ماء وبعد ان يبتلعها تسأله البطلة فورا: هاه عامل ايه دلوقتي؟ المفاجأه انة يرد عليها الحمد لله بقيت احسن.... كده بالسهولة دي.. هو واخد حبة البركة ولا ايه؟
*******
عندما يصل البوليس الي موقع الجريمة دون ان يبلغه احد
تقريبا المخرج هو اللي بلغ علشان يصور.. أمّال هيصور ايه
*******
عندما يصاحب مشهد التغرير بالبطلة لقطات الامطار الغزيرة والبرق والرعد والشباك اللي ينفتح فجأة علي الأخر وتلاقي البطلة في الفيلم قالعه بدون مناسبه

*******
عندما يكون من المستحيل ان تجد الهاتف مشغول والطرف التاني يرد من قبل ما النمرة تجمع ولا تدي جرس حتى
*******
العبارة الساذجة الشهيرة اللي تصاحب مشهد القبض علي المجرم: مفيش جريمة كاملة.. أنت فاكر انك هتهرب من البوليس بعملتك دي
*******
عندما يخرج الطبيب من غرفة العمليات ويرد بواحدة من ثلاث جمل

للأسف اضطرينا نضحي بالجنين
شدو حيلكوا يا جماعة
العملية نجحت بس مش هتقدروا تشوفوه دلوقتي
*******
عندما يجلس البطل والبطلة في نفس الكازينو بتاع كل فيلم اللي في وش ماسبيرو ويطلبوا نفس العصير اللي في كل الافلام: تانج او ميراندا
ويخلص المشهد من غير ما حد يشرب حاجة
تقريبا علشان هيتصور بالمشاريب دى فيلم تاني
*******
عندما يصاب البطل برصاصة في قلبه وتنزف الدماء من بطنه زي صلصلة الكشري ويظل يتحدث بطلاقة وتركيز لمدة خمس دقائق يقوم خلالها بفك لغز الفيلم والاعلان عن القاتل الحقيقي
*******
عندما تتناول الابنة الفطار وهيه واقفة وبتاخد لقمة سريعة فتقولها الوالدة ما تفطري كويس يابنتي فتقولها: لا علشان الحق المحاضرة وتبوسها وتمشي فتنظر الوالدة الي الوالد ويبدأن في الدعاء
*******
عندما تجد مقر العصابة مليان بالقش والبراميل الخشبية والحبال
*******
عندما ينزل البطل أو البطلة من العربية المرسيدس ويطلعوا البيت من غير ما يقفلوا شبابيك العربية أو يقفلوها بالمفتاح البلد أمان بقى

*******
عندما يضرب البطل أعدائه بالبوكس فتسمع أصوات انفجارات
*******
لما الأم او الزوجة تدخل على ابنها او جوزها أوضة النوم ...وتسأله بكل ذكاء : انت نايم ؟؟

العجيب انه يرد عليها يقلها : اه انا نايم

*******

ولما يكون اتنين قاعدين ف شقة خصوصا لو شقة البطلة والباب خبط ..يقوم البطل يسأل البطلة : انتي مستنية حد ؟؟ ... كأن الباب مابيخبطش غير لما يكون ف حد واخد معاد ..

*******

وحكاية التلفونات برضه ...تلاقيه بيطلب رقم ع الموبايل وعلى طول يحطه على ودانه ويقول ألو ... متعرفش لحق يجمع إزاى متعرفش

*******

ومن أشهر عبارات رجال الشرطة : سلم نفسك يا دنجل ...المكان كله محاصر ...مفيش أبدا داعي للهرب

*******

لا وكان في العبارة المشهورة جدا : أي حركة هاضرب ف المليان ! اموت واعرف ايه المليان ده

*******

لما قبل نهايه الفيلم بخمس دقايق تلاقي البطل يجري ورا البطله ووراهي الهتيف بتاعه وصحبته والام والاب ورجل العصابه وكيس الذره معاهم(قصدي الفلوس) وفي الاخر نلاقيهم بيبوسوا بعض ويروح الكل مبتسم ,وبعدين نلاقي كلمه "النهايه هع" مكتوبه بالبويه

*******

لما نشوف الدكتور خارج من العمليات وبيقول "احنا عملنا اللي علينا والباقي على ربنا"

*******

لما نلاقي الممثل طالع من الكليه من وسط زحام النتيجه وعامله نفسه مكشر وحزنان وتروح البطله تساله"هاه عملت ايه" يروح فجاه ضاحك عليها ويبشرها باالنجاح

*******

الجمله الخالده اما تيجي توقف تاكسي وتقوله ( اطلع يا اسطي ) والاسطي طبعا يطلع وما تنزل و تديله الفلوس عمره ميتكلم مهما كان المبلغ

*******

لأ وكله كوم والحته الجامد اوى اللى بتيجى فى معظم الأفلام اما واحد يضرب البطل بالنار فالبطل يرد عليه ويقوله (قتلتنى يامجرم)

*******

فى الأفلام الدينيه تلاقى الناس كلهم مكشرين و قافشين طول الفيلم

*******

فى الأفلام الدينيه برضه تلاقى الكفار لابسين أسود والمسلمين لابسين أبيض (راجع فيلم فجر الأسلام) ده حتى لما واحد أسلم تانى يوم لبس أبيض على طول

*******

أعمار الممثلين اللى بيلعبوا دور الشباب فى الجامعه ,بيكونوا فى مرحله عمريه يطلق عليها على سبيل الأدب (سن اليأس) أو (ربيع العمر)

*******

الممثله بتصحى حاطه مكياج و مسرحه شعرها كمان !!

*******

مشهد النهايه هو زواج البطل بالبطله, لولولوللولى ...

*******

البطل بيجوز البطلة و لازم يجيبوا مشهد ان البطلة حامل و جابت ولد سمته احمد

*******

فى الافلام الاكشن المصرى لازم البطل يطحن اى حد يأف اصاده و فى أخر الفيلم يجيلوا الوحش الكبير اللى يخلى البطل ينزل دم من كل حتة فى جسمه و بعدين فى ثانية واحدة يقوم ضربه بوكس يقوم الوحش ميت أو زعيم العصابة يموت!

*******

البطل ياخد براءة من تهمة ظلم والدوله تكافئه على اللى عمله (على انه قتل زعيم العصابة طبعا مثلا)

*******

تحصل خناقة بين البطل وراجل في القهوة تلاقي كل القهوة قامت تضرب في بعضها وكل واحد شال كرسي وضرب اللي قدامه متعرفش ليه(بتحصل والله كتير جدا)

*******

ان أي فيلم لازم يبقي فيه بيرة وخمرة وخاصة الأفلام الجديدة مثلا حرب اطاليا و ظرف طارق لزوم الرواشة يعني متلاقيش الأبطال قاعدين مع بعض الا اذا كانوا بيحششوا وبيشربوا بيرة مينفعش حاجة ساقعة مثلا و لا كاننا فى فرنسا...طب ده الخمره بشىء وشويات!!.

*******

انك تلاقي البوليس مشغل السارينة وهو جاي من بعيد عشان يعرف العصابة يقوموا يلحقوا يهربوا

*******

ان لما واحدة تزعق لواحد في الفيلم وهي واقفة قدامه يقوم رازعها قلم علي وشها فتقوم تبصله بحنية أو تردهوله (راجع جميع أفلام ناديه الجندى)

*******
ان البطل او البطلة ينزلوا من الشقة ويسيبوا الباب مفتوح ..

*******
.
ان اي حد يجي يخبط علي الباب يفتحوا علي طول من غير مايبص من العين السحرية وطبعا بيبقي هربان من العصابة او البوليس .. فطبعا لو العصابة هيدخلوا يقتلوه وهكذا

*******

ان الممثل يركب التاكسي ويقول للسواق اطلع ورا العربية دي يروح طالع والسلام

*******

لما تلاقي البوكس او الشلوت بيضرب بعديه صوت الطبلة بخمس دقايق ..

*******

لما ييجي عساكر الشرطة ينزلوا من العربية يقعدوا ينطوا في مكانهم ويقولوا هووووب هووووووووووب ( نص أفلام وحيد حامد وعادل إمام)

*******

لما الظابط يقول للمجرم مش ناوي تبطل عمايلك دي يامجرم أديك وقعت في شر أعمالك خدوا علي البوكس ياعسكري..

*******

إن البطل لازم يحب واحدة حلوة وخلاص وتلاقيها معجبة بيه ومش قادرة تسيبه حتي لو هوا شحات و مش لاقي ياكل
أو قصير تخين رفيع أهبل صايع ( بوحة -الناظر-بلية ودماغه العالية -غبي منه فيه-أبو العربي-صعيدي في الجامعة الامريكية وكتير)

*******

إن حسن حسني يبقي موجود في الفيلم ( بحبه قوى بس بقى عامل زى الطماطم فى السلطه)

*******

مثلا لو مشهد واحده بتخلف تلاقيها عامله فووووووول ميكب و راسمه عينيها و بعد ما تخلف تلاقيها مش عرقانه و لا الميكب علي الاقل ساح من علي وشها نيتجه الانفعال

*******

العيل لما ينزل يبقي بشعر مع انه الطبيعي يكون من غير شعر في دماغه بيبقي قرعه

*******

واحده صاحيه من عز النوم ... شعرها مش منكوش و الميكب مظبوط ميه ميه ... وزى القمر ( كل الممثلات الصراحه)

*******

الشقق علي طول في الافلام العربي نظيفه و متستفه ... و دايما اللي قاعدين في البيت لابسين هدوم الخروج و عاملين شعورهم ... و الحقيقه المره اننا نجلس في المنزل و في بقع فول و طعميه و مسقعه علي هدومنا ...

*******

لازم يكون تلات تربع الفيلم اغاني و رقص .....ولو فيلم عن الصعايده يبفى لازم الصعيدى يجوز ( الرجاصه) و طبعا الجمله الخالده ( الغزيه لازم ترحل)

*******

لازم تكون النهايه ان البطل تتجوز البطل حتي لو بينهم السما و الأرض

*******

اى مشهد فيه محاكمة لازم المحامى يعرق و يتضايق و يحبط وفجاة يدخل المحكمة الشاهد الوحيد ع الجريمة و يقلب كل الموازين والبطل ياخد براءه ... كل الى فى المحكمة يقول يحيا العدل

*******

البطل يتضرب رصاصة فى ضهرو ينزل دم من بقه

و لو اتضرب رصاصة فى بطنه ينزل دم من قفاه.

صح ولا أيه؟!
المصدر....egy film